លោក បោន ប៊ិន៖ គណបក្សប្រជាជនកម្ពុជា ធ្វើដំណើរឆ្ពោះទៅមុខឥតងាករេ បន្តបង្កើនពង្រីកសមិទ្ធផលនានាគ្រប់ទីកន្លែង
បន្ទាយមានជ័យ ៖ អនុប្រធានក្រុមការងារចុះមូលដា្ឋនស្រុកមង្គលបូរី ប្រធានក្រុមការងារចុះមូលដា្ឋនឃុំចំណោម លោក បោន ប៊ិន បានដឹកនាំដង្ហែរក្បួនបើកយុទ្ធនាការឃោសនាបោះឆ្នោតជ្រើសរើស ក្រុមប្រឹក្សាឃុំ-សង្កាត់ អាណត្តិទី៥ ឆ្នាំ២០២២ ដោយមានការចូលរួមពីសមាជិក-សមាជិកា ក្រុមការងារចុះមូលដា្ឋនភូមិទាំង១៨ នៅព្រឹកថ្ងៃទី២១ ខែឧសភា។
ថ្លែងក្នុងពិធីបើកយុទ្ធនាការននេះលោក បោន ប៊ិន ថា៖ សន្តិភាព ស្ថិរភាព និងរាល់សមិទ្ធផលដែលយើងសម្រេចបាននាពេលបច្ចុប្បន្ននេះ គឺបានមកពីការយកអាយុជីវិតធ្វើជាដើមទុនរបស់សម្តេចតេជោ ហ៊ុន សែន ប្រធានគណបក្សប្រជាជនកម្ពុជា បានពលីកម្មដ៏ធំធេងនិងមានការចូលរួមមិនអាចកាត់ថ្លៃបានរបស់បងប្អូនយុទ្ធជន យុទ្ធនារី ជនរួមជាតិយើងរាប់លាននាក់ដើម្បីជាតិ មាតុភូមិ ព្រមទាំងការជួយឧបត្ថម្ភគាំទ្រដ៏ស្មោះសពីបណ្តាប្រទេសជាមិត្ត និងសហគមន៍អន្តរជាតិ។
លោកបានបញ្ជាក់ថា ៖ ជោគជ័យនៃការអនុវត្តនយោបាយឈ្នះឈ្នះរបស់ សម្ដេចអគ្គមហាសេនាបតី តេជោ ហ៊ុន សែន ប្រធានគណបក្សប្រជាជនកម្ពុជា បានធ្វើឱ្យពួកប្រល័យពូជសាសន៍ ប៉ុល ពត ត្រូវបានរលំរលាយទាំងស្រុងទាំងអង្គការចាត់តាំងនយោបាយ ទាំងអង្គការចាត់តាំងយោធា ប្រទេសជាតិទាំងមូលទទួលបានសន្តិភាពពេញលេញ មានឯកភាពជាតិ និងឯកភាពទឹកដី ទាំងស្រុងចាប់តាំងពីចុងឆ្នាំ១៩៩៨មក។ ចាប់ពីពេលនោះព្រះរាជាណាចក្រកម្ពុជាបានបោះជំហាន ទៅមុខយ៉ាងរឹងមាំលើមាគ៌ាសន្តិភាព បង្រួបបង្រួមជាតិ ប្រជាធិបតេយ្យ សហប្រតិបត្តិការ និងអភិវឌ្ឍន៍។
លោក បោន ប៊ិន បានបន្ថែមថា ៖ ប្រជាជនកម្ពុជាបានរស់នៅយ៉ាងសុខដុមរមនាក្នុងសង្គមជាតិ ដោយគ្មានការរើសអើងពីអតីតកាល ឬ និន្នាការនយោបាយឡើយ។ សន្តិភាព និងស្ថិរភាពនយោបាយ បានផ្តល់ឱកាសដ៏មានតម្លៃបំផុតដែលពុំធ្លាប់មានដល់ប្រជាជនកម្ពុជាក្នុងការអភិវឌ្ឍសង្គមជាតិ។
លោកបានអំពាវនាវ ដល់ពលរដ្ឋ បន្តខិតខំការពារថែរក្សាសមិទ្ធផល ដ៏ថ្លៃថ្លាដែលបានមកដោយលំបាក់ ក្រោមការដឹកនាំរបស់គណបក្សប្រជាជនកម្ពុជា ឱ្យបានគង់វង្សជារៀងដរាប ដោយមិនអនុញ្ញាតឱ្យមជ្ឈដ្ឋានណាមួយមកបំផ្លាញទៅវិញបានឡើយ ទោះបីជាត្រូវបង់ដោយតម្លៃណាក្តី។ លោកបន្តអំពាវនាវដល់ពលរដ្ឋដែលមានឈ្មោះក្នុងបញ្ជីឈ្មោះបោះឆ្នោត សូមទៅចូលរួមបោះឆ្នោតជ្រើសរើស ក្រុមប្រឹក្សាឃុំ-សង្កាត់ អាណត្តិទី៥ ពិសេសបោះឆ្នោតជូនគណបក្សប្រជាជនកម្ពុជា ដើម្បីទទួលបានការអភិវឌ្ឍន៍រីកចម្រេីនទៅមុខបន្តទៀត។
លោក បោន ប៊ិន ថា គណបក្សប្រជាជនកម្ពុជានៅតែបន្តប្តេជ្ញាថែរក្សា និងបន្តកសាងប្រទេសជាតិ យើងឲ្យកាន់តែរីកចម្រើនក្លាយជាប្រទេសជឿនលឿនមួយក្នុងតំបន់ ជាសង្គមប្រកបដោយអរិយធម៌ និងសេចក្តីស្រឡាញ់ ដោយគ្មានការកើតឡើងជាថ្មីនូវសង្គ្រាម អំពើប្រល័យពូជសាសន៍ និងការបែកបាក់ផ្ទៃក្នុងជាតិដូចពេលមុនទៀតឡើយ ព្រមទាំងការពារមាតុភូមិឲ្យបានគង់វង្សរឹងមាំជារៀងរហូតតទៅ៕
